FERROL VELLO

A ASOCIACION DE VECIÑOS DE FERROL VELLO E A COMISIÓN CIDADÁ POLA RECUPERACIÓN DE FERROL VELLO DENUNCIA O ESTADO DA CASA NATAL DE CARVALHO CALERO

envíado por Ferrol | 22 Marzo 2007 | sin comentarios

Hoxe mércores, a eso das 12.30 horas, dúas unidades do corpo de bombeiros municipais personáronse á altura da rúa San Francisco, 51, xunto con técnicos municipais. A razón era, ao parecer, o risco que supoñían galería e cornixa da fachada da casa natal de Carvalho Calero, que facía necesaria a súa intervención.

Nunha primeira actuación, os bombeiros, como se mostra nas imaxes que se adxuntan, limitáronse a eliminar alguns elementos da galería e cornixa, pedazos de madeira soltos, listóns e elementos ornamentais apodrecidos, por considerar que era suficiente para garantir a seguridade. Nembargantes, os técnicos municipais creron oportuno eliminar dous montantes da galería e varios panos acristalados, deixando parte da cuberta do vóo sen substentación algunha.

Sen entrar a valorar a xustificación desta intervención, pensamos que o de hoxe supón un paso máis cara a declaración de ruina do inmoble (que o concello ten enriba da mesa, e sobre a que terá que decidir en breve a instancias dos propietarios) e, polo tanto, a destrucción definitiva dun elemento moi significativo do patrimonio arquitectónico e cultural da nosa cidade.

Non é difícil sospeitar que detrás da pasividade dos propietarios hai unha estratexia clara:

Primeiro, deixar o edificio sen protección nengunha e mesmo contribuir discretamente ao deterioro da súa cuberta.

Logo, xa exposta a propiedade ás inclemencias meteorolóxicas, só queda agardar a que éstas deixen notar os seus efectos sobre a cuberta, estructura e carpintería do inmoble, xerando os consabidos problemas e perxuicios sobre a calidade de vida dos veciños do barrio: inseguridade por desprendementos nas rúas, suciedade nas ruinas, paisaxe urbana desagradable, etc.

Finalmente, cando o estado de deterioro é xa moi avanzado, só queda solicitar a declaración de ruina, que o Concello concede.

Con esto, o que antes era un edificio único na súa especie, de interese patrimonial e cultural, agora é un solar onde facer un par de alturas máis das que antes había. Esto, que tristemente vai sendo cada vez mais habitual, supón unha perda irreparable para o patrimonio construido da cidade.

A asociacion de Veciños de Ferrol Vello e a Comisión Cidadá pola Recuperación de Ferrol Vello queren denunciar públicamente, por tanto, a desidia coa que segue a tratarse este tema, e reclama ao Concello un cambio radical de actitude.

Á marxe do particular interese deste edificio, preguntámonos por qué o Concello de Ferrol non fai cumplir a ley esixindo aos propietarios as súas responsabilidades na conservación do patrimonio, por qué non lles obriga a cumprir có deber de mantenemento do estado das súas propiedades, especialmente nos barrios de meirande valor cultural (Ferrol Vello, a Madalena, Esteiro e partes de Canido). Non pedimos nada novo, non fan falla reformas lexislativas; bastaría con aplicar a lexislación urbanística vixente, que contempla un proceso perfectamente reglado: os técnicos municipais visitan o inmoble e fan un informe do seu estado; a concellería de Urbanismo insta ao propietario a reparar o edificio nun prazo determinado, e a partir desta data pode impoñer sancións e multas, chegando finalmente a facer a obra de reparación por conta do propietario.

Nembargantes, esta iniciativa municipal non se ve case nunca, cando debía ser práctica común tendo en conta o estado de abandono de tantos inmobles no barrio. En todo Ferrol Vello tan só media ducia de edificios teñen aberto un proceso de este tipo, aínda que a Asociación de Veciños xa instou en dúas ocasións nos últimos seis meses ao Concello a intervir neste eido, adxuntando na solicitude unha relación de máis de 25 inmobles que consideraba estaban en mal estado.

Pero queremos insistir que neste caso concorre ademáis unha circunstancia agravante: o inmoble é a casa natal dun importante escritor, feito que en moitos lugares é aproveitado para crear casas-museo ou pequenos centros culturais onde se dean a coñecer a súa figura e a súa obra (qué gran idea sería unha biblioteca de barrio). Non é a primeira vez que, seguindo algunha guía turística da cidade, algún visitante pregunta pola Casa Natal de Carvalho Calero, poñendo a algún veciño do barrio no compromiso de lle sinalar, non sen vergoña, unha ruina.

A adquisición da Casa Natal de Carvalho Calero foi acordada o pasado ano polo Pleno da Corporación Municipal, e inclúese no convenio de Reurbanización da Madalena e Ferrol Vello, a conta do IGVS da Xunta de Galicia. Polo tanto non lle costaría un peso ás arcas municipais, e se non se fai é por falta de vontade política.

Esiximoslle ao Concello, xa que logo, o cumprimento dos compromisos adquiridos.

O vindeiro luns cúmprese o XVII aniversario do escritor e filólogo. Bonita forma de celebralo.

BONITA FORMA DE CELEBRALO