FERROL VELLO

A FEIRA DA ILUSTRACIÓN SERÁ MEDIEVAL E CELEBRARASE NO BARRIO DE FERROL VELLO

envíado por Ferrol | 23 Junio 2007 | sin comentarios

O departamento de Cultura do Concello de Ferrol traballa contra o reloxo para pechar o programa das festas de verán. Á espera de confirmar a presenza de importantes artistas, a edil Yolanda Díaz anunciou onte cambios na Feira da Ilustración e garantiu o apoio ós grupos locais.

"Quero enviar unha mensaxe tranquilizadora ós cidadáns porque imos ter unhas festas de verán dignas e para toda a cidade", manifestou Díaz. A concelleira informou de que o departamento de Cultura está facendo tódolos esforzos posibles para pechar actuacións nun momento no que a maior parte dos grupos teñen xa completa a súa axenda. Aínda que non quixo desvelar o nome de ningún dos artistas cos que se contactou, asegurou que se están a facer unhas festas "para tódolos públicos". "En poucos días teremos o programa definitivo e difundirémolo aquí e fóra para que veña o maior número de xente a visitarnos", engadiu.

O que si quixo deixar claro Díaz é que se contará coas formacións ferrolás: "Serán protagonistas tódolos artistas nosos, que son valiosísimos". Ademais asegurou que se encherán de contido tódalas prazas e que, a pesar das obras no parque Raíña Sofía e das dificultades para programar na praza de Armas, acondicionarase algún tipo de este espectáculo para estes espazos.

Feira > Un dos cambios confirmados por Yolanda Díaz é o da nova denominación da Feira da Ilustración, que ademais móvese do Cantón -comezou no centro do barrio da Magdalena- a Ferrol Vello. "Vaise chamar Feira Medieval para ser máis coherentes cos contidos que había e será ademais nun barrio que reúne unhas condicións magníficas para ubicar ese acto", dixo Díaz.

Os 140 postos que formarán parte da feira dos días 3, 4 e 5 de agosto ubicaranse nas rúas San Francisco, Carme Curuxeiras, Benito Vicetto e Espírito Santo e tamén na praza Vella.

Música > Outra das medidas anunciadas pola nova concelleira de Cultura, no que chamou un "cambio tranquilo", ten que ver coa Banda Ferrolá de Música. A partir do mes de xullo tocará, cada domingo, de unha a dúas da tarde, no Cantón de Molíns. "A concepción que temos nós da banda de música é que ten que estar ó servizo da súa cidade e ten que facer exactamente isto". Expresou a súa confianza en que esta iniciativa conte con apoio dos cidadáns. "Cando sexa un proxecto consolidado será un éxito".

Co cambio de goberno a área de Cultura afronta tamén novas liñas de traballo, aínda que Yolanda Díaz explicou que, debido á urxencia de organizar as festas de verán, o resto das áreas terán que agardar. Aínda así, adiantou que haberá cambios na forma de xestionar o Jofre -a concesión, por un período de dous anos, remata en novembro-.

Outra das vías de traballo da nova concellería será a de dar a coñecer na propia cidade a artistas propios. "Hai xente que destaca e triunfa fóra pero que non ten un espazo para brillar en Ferrol", dixo Yolanda Díaz.

El Diario De Ferrol