COMEZAN A CHEGAR A CURUXEIRAS OS PRIMEIROS BARCOS
envíado por Ferrol | 1 Julio 2007 | sin comentarios
A "Jatiña", unha dorna de Portonovo, de 6,10 metros de eslora total e 2,10 metros de manga, chegou onte por estrada ó peirao de Curuxeiras, converténdose na primeira embarcación tradicional en tocar o porto ferrolán das que participarán no Encontro desta semana. Ata o de agora hai confirmadas a presenza de 81 barcos, o que supón unha tripulación, segundo datos dos organizadores, de 380 persoas. Esta cifra incrementarase segundo se achegue o xoves, data oficial da inauguración deste VIII Encontro, ata alcanzar ou incluso superar o centenar de naves.
Para acoller ós visitantes, o Club de Mar de Ferrol (organizador do encontro coa Federación Galega pola Cultura Marítima e Fluvial e o Museo do Mar de Galicia) comezou xa a instalar infraestructuras en terra e en auga. O venres colocaron 130 metros de pantaláns para o atraque das embarcacións. Onte afanábanse en construír as carpas nas que se ubicarán os postos de diferentes museos, os obradoiros e os puntos de información. En breve poñeranse mans á obra coa taberna marítima, outro dos lugares centrais dentro da programación destas xornadas de festa.
A "Jatiña" abre o camiño para as demais embarcacións, moitas das cales abríganse xa nas rías cercanas á Coruña, onde aínda hoxe se celebra a II Concentración de Embarcacións Tradicionais.
Ó encontro chegarán barcos de tódolos puntos da Península Ibérica e das Azores. Ademais haberá representación francesa, italiana e británica. Acompañaranos autoridades. É o caso do delegado do goberno das Azores.
www.aduaneirossemfronteiras.org