FERROL VELLO

ADEUS A CARMELO TEIXEIRO

envíado por Ferrol | 8 Febrero 2008 | 1 comentario

A Asociación de Veciños “Ferrol Vello”, ante a noticia do falecemento de Carmelo Teixeiro, quere facerlles chegar á súa dona, fillos e demais seres queridos as súas mais sinceras condolencias. Nestes momentos de pesar e tristura, gustaríanos que souberan que non están solos e que contan co noso cariño.

A Carmelo xa non lle podemos dicir mais nada. Fóisenos. O Carmelo mais público, o que coñecíamos nós, infatigable loitador, constante, sempre animoso, deixa a batalla. Pero quedamos nós, quedamos os demais. Non o podemos traer de volta, pero si podemos, e debemos, aproveitar o seu impulso e seguir o seu exemplo. El non se rendeu nin ao final, cando o corpo non lle respondía. Non nos rendamos nós.

Carmelo morreu nun martes de Carnaval no que o vento lle impediu a entrada a un novo gaseiro. Simbólica coincidencia, a da natureza defendéndose no día da ironía, da sátira, da crítica, do absurdo. Como absurdo e sen sentido é todo o que rodea á planta de gas da ría.

Cremos que as cousas poden facerse mellor, e que aínda estamos a tempo de corrixilas. Vaian os nosos esforzos en homenaxe a Carmelo, e sirvan de agradecemento por toda a súa labor.

Sabemos que Carmelo sempre quixo a Ferrol Vello e á nosa asociación. Que saiban todos tamén que intentaremos estar á súa altura, e que seguiremos loitando en defensa da seguridade, da ría e da legalidade.

PLANTA DE GAS FORA DA RÍA