FERROL VELLO

MOCION DO GRUPO MUNICIPAL DO BNG RELATIVA ÀS DESCARGAS DE MATERIAIS CONTAMINANTES NOS PORTOS DE FERROL

envíado por Ferrol | 28 Marzo 2008 | sin comentarios

MOCION DO GRUPO MUNICIPAL DO BNG RELATIVA ÀS DESCARGAS DE MATERIAIS CONTAMINANTES NOS PORTOS DE FERROL

O Grupo municipal do Bloque Nacionalista Galego ao abeiro da lexislación vixente apresenta para o seu debate en Pleno á seguinte MOCIÓN

Exposición de Motivos:

A actividade comercial no porto de Ferrol non sempre é todo o respectuosa que debería para co conxunto de veciños e veciñas das zonas próximas. Os traballos de carga e descarga dos buques ocasionan molestias que nalgúns casos, mesmo, pode afectar a saúde das persoas ao tratarse da manipulación de materiais considerados contaminantes.

Ás vellas reivindicacións dos veciños de Ferrol Vello, Canido, ou A Cabana, polas descargas no Fernández Ladreda, uníronselles tamén as protestas dos colectivos veciñais de Cariño , Doniños, ou Valón coincidindo coas descargas de clincker no Porto Exterior que se fixeron sen tomar as medidas preventivas oportunas e que coa futura entrada en funcionamento do mesmo este tráfico de mercadorías ira en aumento pola zona.

A descarga de materiais como o clincker, a magnesita ou a chatarra sen tomar as medidas de seguridade que establece a lexislación oportuna supoñen unha agresión contra a saúde pública que non fan máis que poñer en serio perigo a saúde dos veciños.

Os diferentes colectivos veciñais implicados teñen posto en coñecemento das autoridades competentes esta situación en reiteradas ocasións sen obter resultados satisfactorios.

Recentemente e agravando esta situación a Autoridade Portuaria en vez de facer cumprir as normativas vixentes en materia de carga e descarga, permite a descarga de carbón no porto interior Fernández Ladreda en lugar de facelo na terminal de carbón sen tomar ningún tipo de medidas medioambientais.

A Autoridade Portuaria consinte este tipo de malas prácticas e non esixe aos diferentes consignatarios a instalación de sistemas que eviten riscos para a saúde dos veciños e veciñas.

Por este motivo o grupo municipal do BNG propón ao Pleno a adopción do seguinte

ACORDOS:

1.- O Pleno do Concello de Ferrol insta a Autoridade Portuaria a tomar as medidas necesarias para facer cumprir a lexislación vixente en materia de carga e descarga nos Portos de Ferrol e tomar as medidas oportunas para evitar as molestias que esta actividade causa entre a veciñanza das zonas limítrofes aos portos.

2.- O Concello de Ferrol dará traslado deste acordo á vindeira reunión do Consello de Administración da Autoridade Portuaria por medio do representante municipal neste organismo.

Ferrol a 14 de marzo de 2008

asdo.- Xoán Xosé Pita Díaz asdo.- Elia Rico Lagarón

SR. ALCALDE DO CONCELLO DE FERROL