FERROL VELLO

PARABÉNS AO CONCELLEIRO DE URBANISMO ÁNGEL MATO ESCALONA. AS CIDADES FERMOSAS ESTÁN CHEAS DE DECISIÓNS VALENTES

envíado por Ferrol | 14 Abril 2008 | 3 comentarios

AS CIDADES FERMOSAS ESTÁN CHEAS DE DECISIÓNS VALENTES

Mato explica que o edificio do Hotel Plaza non se axusta á licenza de obras concedida no seu día

O concelleiro de Urbanismo explica que a obra carece asimismo de licenza de primeira ocupación e licenza de apertura

O concelleiro de Planificación e coordinador da área de Urbanismo, Ángel Mato Escalona, informou de que, emprazado no barrio histórico de A Magdalena e despois de que se iniciaran as obras de construcción en 1999, o inmoble no que se pretende abrir o Hotel Plaza carece a día de hoxe de licenza de obra axeitada para o realmente construído, de licenza de primeira ocupación e de licenza de apertura. O edificio foi construído, entre outras irregularidades, cunha pranta máis das permitidas na licenza concedida e, tamén, cun baixo cuberta inexistente na dita licenza. Carece tamén de certificación final de obra e, dende hai dez anos, foi obxecto de catro denegacións por parte de Patrimonio, dunha firmada polo Concello de Ferrol e de tres expedientes por incumplir a legalidade abertos pola Administración local. Así mesmo, durante o mandato anterior de BNG-PSOE, se fixo efectiva a orde de precintado.

Nesta liña, o edil de Urbanismo subliñou o venres pola mañá que o goberno municipal actual ten o firme mandato dos cidadáns de garantir a legalidade e que esta se produce por e para todos e todas, con independencia da súa condición. Máxime nunha cidade que pretende ser Patrimonio da Humanidade e nun barrio histórico, o de A Magdalena, que debe ser referente para a urbe naval.

Deste xeito, Ángel Mato apuntou que o promotor de dito edificio, dende 1999, incumpriu sistematicamente a normativa urbanística. Entre outros aspectos, con incrementos de volumes ou excesos de alturas máximas permitidas. E, plano en man, visualizou estes incumprimentos pranta a pranta. Apuntou que o Concello, lonxe de ter un interese espúreo só pretende exercer as súas competencias: velar polo cumprimento da norma. Así as cousas, indicou que o propio promotor recoñeceu a situación ilegal do inmoble cando, en decembro de 2007, presenta un expediente de legalización das obras, ao ter incumprido o estipulado na licenza de obras que no seu día se lle outorgou. Deste xeito, Ángel Mato desmentiu, como afirmou o promotor, que a legalización veña dada neste caso por silencio administrativo positivo, xa que este nunca se pode dar cando existe acto previo ilegal.

O edil de Urbanismo tamén avanzou que, tras os informes técnicos dos que dispón e que trasladou á Secretaría Xeral do Concello, o seu departamento está á espera de recibir os informes xurídicos pertinentes para proceder á denegación da legalización solicitada e ordear, en caso necesario, o precintado do inmoble. O paso seguinte sería executar medidas correctoras que permitan a legalización, resolvendo os incumplimentos existentes. En definitiva, trataríase de buscar unha solución ao abeiro do marco legal existente, como non podería ser doutro xeito.

Por último, Ángel Mato deu conta do interese por parte deste goberno local de promover a actividade económica e a rehabilitación no barrio histórico de A Magdalena. Iso si, no marco da legalidade. Precisamente e concluíndo, avanzou que o próximo luns, na primeira reunión da Comisión de Seguemento do PEPRI de A Magdalena, trataráse este asunto, entre outros máis.